رجل حر رغم القيود .. رغم انف الحاقدين

النشيد اهداء من مدونة الكوماندوز وانا قمت بعمله فيديو

جزاه الله خيرا

النشيد اهداء من مدونة الكوماندوز وانا قمت بعمله فيديو

جزاه الله خيرا

بجد الواحد مش عارف يعلق يقول ايه ولا يكتب ايه مشاعر كتيره حسينا بيها قبل الجلسه وبعد الجلسة
قبل القرار وبعد القرار
حقيقى كان نفسي مارحوش محدش يسألنى ليه
الواحد كان متأكد من القرار
بس قلت اعمل اللى عليه واثبت وجود يمكن تحصل معجزه والقاضى يفوق اما يشوف الاهالى كثار ينئح عليه ضميره او يقرر في لحظه يتوب
رحت وكان عندي يقين ان ربنا هيقدر الخير حتى وان كان في ظاهره غير كده
بس العجيب
التوتر الغريب اللى كنت فيه اعصابى كانت سايبه وكل اما اقول لحد يقولى وانا كمان رغم انى من النوع المتماسك جدا
المهم بدأت الجلسه وخلينا نقول انها كانت اسوأ من مهزلة
مدنيين اه لكن اكيد في العسكريين ناس بتفكر عنهم وده اللى خلانى اتساءل
ما دام الرئيس واتباعه سلطاتهم نافذه وبينفذوا اللى عايزينه في الاخر ليه ميلعبوش صح ويحسنوا صورتهم امام العالم والشعب ويحاكمهم مدنيا
وطالما في قضاه في جيبو كانوا زمان بيتحايلوا على القوانين دلوقتى مش بيحطوا ليها اعتبار اساسا هينفذوا اوامروا ويرموا بالأدلة عرض الحائط
مش بيقروا الورق اساسا يعنى مثلا القاضي الحسينى قعد حوالى شهر على ما اصدر القرار وكان لصالحنا
اما القاضى التانى قعد بالظبط ساعه واظن انها كمان كانت تمثيليه وهو ولا قراه ولا حاجه
المهم عدت الجلسه وطلع القرار وزعلنا مش بس علشان القرار علشان ملحئناش نفرح وزمان كان اللى بيغلط بيكسف ويعمل غلطته ويجري دلوقتى الغلط بكل المقاييس وبكل بجاحه برده
قعدنا نحسبن في وشه وهو يكمل القرار ولا اتهزت له شعره واحده لانه كان مأمن نفسه بحبة رتب حلوه كده قدامه مش عارف ان مفيش بينه وبين ربنا حواجز
المهم روحنا معرفتش بعدها اعمل اى شيئ حتى التدوين لحد ما جت اللحظه اللى قررت فيها اوجه رسائل قصيره لكل اللى شارك في القصه ديه وهبدأ: بالظالمين رئيسا واتباع ،القضاة ومحامى الدفاع
المظلومين وهم ابائنا خلف الأسوار وامهاتنا الحاضرات الصابرات ومحامينا الأفاضل وختاما نحن الابناء

الرساله الاولى

مش هاقول اتق الله علشان قالها كتير قبلى هقول بس ياترى عمرك فكرت في الأخره ربع ما فكرت في الدنيا
يا ترى تفكيرك في الدنيا مش خلاك لحظه تفكر في التاريخ اللى هيكتبوه الأجيال اللى جايه عنك
حاول تفكر ولو للحظه وانا واثقه ان نتيجة تفكيرك هتكون اكيد كويسه

الرساله الثانيه
لاتباع السيد الرئيس واللى حواليه
المناصب هتزول وعلشان كده وصلت لكم لكن هيبقى ذنب طمعكم اكبرمما تتخيلوه

الرسالة الثالثه
المستشارين اللى ايدو قرار الرئيس
اتمنى تكونوا فرحتم بالمكافأه اللى خدتوها وميكونوش ضحكوا عليكوا وفاصلوا كتير لحسن لا تحصلوا دنيا ولا دين
اتمنى تحفظوا وشوشنا كويس علشان ماعدنا معاكم عند قنطرة المظالم احنا وكل المظلومين اللى هيقضوا في السجن سنين بسبب كلمة منكم وقرار سياسي معد لكم

الرسالة الرابعه لمحامى قضايا الدولة
المدعوا محمد بكر
حقيقي اتمنى تترافع كويس على الاقل عن نفسك قدام ربنا
وبرده افتكرنا لما يجى جزائك في الدنيا قبل الاخره

الرسالة الخامسه
الى الرجال الشرفاء ابائنا اللى بجد بنفتخر بيهم في كل مكان وكل زمان في المحنه دي اتعلمنا حاجات كتير منكم وربنا يجازيكم عنا كل خير ورغم كل شيئ وكل القرارات علمتونا ان الله غالب على امره ولو كره الكافرون

الرسالة السادسه
امهاتنا الصابرات خير خلف لابائنا كنتن كالنحل في الجلسه مشغولات بذكر الله فوالله لن يضيعكم الله

الرسالة السابعة
هيئة الدفاع
مهما قلنا فلن نوفيكم حقكم دعائنا لكم لا يتوقف وكلماتكم ودفاعكم يدل على معادنكم وحبكم وايمانكم فجزاكم الله كل خير
الرسالة الثامنة والاخيرة
لينا احنا ابناء وبنات المعتقلين
بنتعلم كتير وهنتعلم والحمد لله انه اصطفانا
علشان نظبط نفوسنا فشدوا حيلكوا معايا وعايزين كل واحد يشوف مع نفسه
اي حاجه تزعل ربنا ويبطلها فنتظبط بسرعة علشان اللى في السجن دول حرام عايزين يخرجوا
شدوا حيلكوا