تابع حلقات الشاطر وسعيد .. هنا

————————————

ده شعر كتبه ابي لسعيد ويخاطب فيه بهية اخت سعيد

————————-

يا بهيه وخبريني يابوي علي اللي جري لسعيد

—-

حبسوه السفاحين يابوي من ظلام العبيد

وجابوه من زيني ياعيني ومكبل بالحديد

حراسه كتيير ويامه وسلاحهم كله حديد

—–

والزيني ولا دراش علي فين اخذوك يا سعيد

واخوانه باتو في حيره وامه في حزن شديد

يابهية وخبريني علي فين راح اخوك سعيد

—–

أخذوه علي سجن طره وفي بوابته الحديد

أخذوا منه جلابيته مع زنطة الجديد

سحبوه علي الانفرادي وسابوه هناك وحيد

مع حبة فول وجرايه لا يمكن يوم تزيد

من بعد القشطه البلدي وفطيرة ام سعيد

—–

يا بهية وخبريني علي حال اخوك سعيد

—–

فورا في اليوم التالي من طلعة البدريه

أخذوك يا سعيد طوالي وقالولك علي القضيه

دي قضيه خطيره خالص دي قضية جاسوسيه

وسعيد يقول يا نيابه انا مالي ومال دي رزيه

هو احنا ياناس في غابه ولا في عصر الهمجيه

لما تجبوني هنا من غير ولا تهمه ليه

لما تجبوني أنا وتسيبو الاسرائليه

يا ناس حرام عليكوا وكفاية ظلم فيه

ياناس سبوني أروح لأمي وأختي بهيه

وأعطوني الله لا يسأكم الزنط والجلبيه

—–

يا بهيه وخبريني يابوي علي اللي جري لسعيد

—–

يوم ورا يوم يفوت وسعيد في الاستقبال

محبوس حزين لحالة من غير حتي سؤال

والامن مع النيابه بيمدوا في الاعتقال

وغرفة المشوري دي آخر استهبال

أما الجرانين تفبرك في كل يوم اقوال

ياناس حرام عليكم وكفاية بقي اعتقال

ياناس سبوني ار وح أدور الاشغال

خلوني اروح لزيني واطل علي العيال

—–

يا بهيه وخبريني علي حال اخوك سعيد

—–

ردت بهية وقالت أصبر ي اخويا سعيد

كلتنا في برا مصر مساجين من غير حديد

وكل يوم والثاني بيجينا ظلم جديد

ربك يفرجها يا خويا ويهون علي العبيد

ويحكم شرع ربك وتعود يا سعيد سعيد

استكمالا لحكايت ابي والنوادر مع سعيد

في قضية سلسبيل 92

يحكي لنا ابي

 انه كان في يوم من الايام جاء له الدكتور محمد بشر ليزوره من النقابة

ولم يوافق مأمور السجن له بالزيارة

فقام الدكتور بشر بالشكوي ضد هذا الظابط

فعندما علم هذا الظابط ماتم ضده

قال : كده يعني .. طيب ممنوع دخول اكل ملكي للمهندس خيرت

وكان ابي حينها محبوسا في سجن انفرادي

وكان الاكل يذهب اليه كل يوم مع عمي بهاء

 وظل ابي علي هذا الحال يأكل خبزا فقط لمدة ثلاثة ليالي

وبعد ذلك اذا بأول يوم رمضان يأتي

والاكل مازال ممنوعا

وكان عمي كل يوم يأتي بالاكل الي باب السجن ويرجع بعد منعه من تدخيل الاكل

فبعث له ابي انه اذا منعوا الاكل ثانية فليوزعه علي العساكر

حتي لا تتضايق امي وتحزن علي عدم دخولة

 وكان في الزنزانه المجاوره لابي سعيد

ودائما ما كان يكلمه من النافذه من وراء القضبان

فقال سعيد لابي

شوفت ياشيخ محمد النهارده رمضان

زمان الحاجه دلوقتي قاعده في البيت تعمل البط

والمحشي والحمام

وانا هنا آكل العيش والعدس الناشف

فرد ابي ماتزعلش يا سعيد انت نفسك في ايه؟

بط وحمام ومحشي؟

فرد سعيد انت بتسخر مني يا شيخ محمد 

ده انت اصلا ممنوع عنك الاكل

فرد ابي وقال لا ياسعيد ربك هايفرجها

ومر الصول امامهم وكان يسمي عمو بها الحاج بوهي

فسأله ابي اهوا الحج بوهي جه؟

فقال اه ومرضوش يدخلوه ووزع الاكل بره علي العساكر

 فسعيد قال خلاص مافيش امل يا شيخ محمد

فابي قاله لا ياسعيد ربك هايفرجها

 وبعدين شمعوا السجن

والتشميع يعني قفل الزنازين ثم العنبر ثم السجن كله والمفاتيح تخرج بعد كل مرحله خارجا

-وهي طريقة تستخدم حتي الان في السجون-

وابي بيقول وانا قاعد في الزنزانه لقيت صوت بينادي

يا شيخ محمد ياشيخ محمد

فابي قال اكيد مش انا

فاللي بينادي قال زنزانه رقم كذا

فابي بيقول انا مكنتش حافظ رقم الزنزانه فمرديتش

فالراجل قال يابتوع سلسبيل

ابي قال انا قمت وقلت نعم ميين؟

فردقال احنا الزنزانه اللي فوقك

وعزمينك انت وسعيد علي الغداء

رد ابي قال ازاي والسجن متشمع

كلوا انتوا بالهنا والشفا

فقال مالكش دعوه يا شيخ احنا عاملين حسابنا

وبعدين ابي بيقول لقيتهم حاطين الاكل في اكياس صغيره علشان تعرف تعدي من القضبان

ونزلوها في حبل وكانت اكياس كتيير

والراجل قال كل سنه وانتو طيبين يا شيخ محمد

احنا عشره بنسلم عليك

فشكرهم ابي وفتح الاكياس

فلاقي بط ومحشي وحمام زي ماكان سعيد قال بالظبط

فقام سعيد وقال ياشيخ محمد انت طلعت شيخ بجد

في قضية سلسبيل عام 92

كان ابي محبوساً في السجن الانفرادي

وكان جاره في الزنزانة المجاورة

رجل من قرية ريفية

يسمي سعيد

وكان سعيد متهم بقضية جاسوسية

وكان لا يعلم شئ عن هذه القضية

فضلاً علي انه كان من غير المتعلمين

فلم يكن يعلم معني جاسوسية

وكان ابي دائما ما يحكي لنا حكايات ونوادر مع سعيد

حدثت في اثناء هذه القضية

وقد الف ابي العديد من الاشعار اثناء تقضية هذه الفترة

ومنها هذا الشعر بعنوان

محلاها عيشة الفلاح

  

محلاها عيشة الفلاح … قاعد في السجن ومرتاح

لا بيزرع غله ولا فول… ولا عنده بهايم وعجول

قاعد كده نايم علي طول.. محلاها عيشة الفلاح

لا بيزرع ربه ولا باميه… ولا زرعه اولي ولا تانيه

ولا حاسس خالص بالدنيا … محلاها عيشة الفلاح

لا بيدفع ميه ولا نور.. ولا عنده فرح ولا سرور

ولا خلفة عيل وطهور …قاعد في السجن المعمور

بنتاج الظلم المشهور … محلاها عيشة الفلاح

عملوله قصه وقضيه … علشان مره في عصريه

عمل عزومة عربيه… محلاها عيشة الفلاح

وحكومة مصر المحميه… بعساكر ياما وحراميه

قالت دي قضية جاسوسيه.. وسلاحهم فيها الجلابيه

محلاها عيشة الفلاح .. قاعد في السجن ومرتاح

  

ان شاء الله سنكتب جميع الاشعار والحكايات التي حكاها لنا ابي اثناء هذه القضية